【Now財經台】滬深交易所昨日(9日)公布最新港股通名單，剔出及新增股份各有33隻。「新貴」之一晶泰科技(02228)，今年6月上市，現價已差不多等於上市價3倍，市銷率(PSR)逾300倍，以現時嘅市況，會唔會已經炒過龍？
信達國際研究部董事趙晞文認為，公司主要收入來源係內地，所以地緣政治風險較低，加上公司有涉獵人工智能(AI)業務，可以畀到好大想像空間投資者，雖然上市後交投唔算活躍，但14日RSI最新已上到76，已去到超買水平，睇返技術走勢，其實動力已開始減弱，如果短炒仍可以考慮，但估值一定係唔合理，值博率唔大。
剔出股份方面，其中兩隻線上醫療股叮噹健康(09886)及梅斯健康(02415)齊急插，其實呢兩隻股份上月已累跌28%及17%，今日一度再急瀉跌23%及37%，會唔會有跌過龍之嫌？
晞文直指，對兩隻股份今日急插唔意外，並相信短期仍有沽壓，醫療股係近年熱門板塊，不過，隨著全球公共衛生重新常態化後，炒作空間已大大減少。
