【Now財經台】有入港股通憧憬嘅江南布衣(03306)逆市造好，今日(9日)表現跑贏大市，早段曾升近5%，高見14.32元，收市仍升逾3%，升勢亦有成交配合，全日成交股數較過去100日同時段平均增逾3倍。
股價造好主要受兩項利好因素帶動，其中1個因素係全年業績，不過，市場最滿意可能係派息，末期息0.86港元，加上中期及特別息，全年派息比率高達97%，股息率都超過10厘。
業績外，江南布衣喺季檢獲納入恒生綜指，有機會晉身港股通，市場憧憬未來有北水加持，刺激股份今日價量齊升，並升穿所有移動平均線，要留意公司將會喺10月28日除淨，除淨前仍有望保持強勢。
