【Now財經台】本港主要房託及收租股7月至今顯著反彈，升勢最厲害嘅領展房產基金(00823)股價累升逾24%，其他如太古地產(01972)、九龍倉置業(01997)、置富產業信託(00778)等都有回升，係咪開始偷步炒定減息？依家係咪入市時機？
安泓投資總監兼香港大學房地產及建設系客席副教授楊書健指，港元銀行同業拆息(HIBOR)的確係偷步炒減息，美國聯儲局減息0.25厘定0.5厘都要等9月中嘅議息會議先有定案，但HIBOR由5月高位至今已經減咗超過1厘。隔夜(9日)HIBOR只有3.4厘，港元息口已經回落，呢啲情況下，房託會彈得最快。
Victor又話，以未來12個月派息率計，領展及太地可以派到7厘息以上，置富股息率高達8.9厘，九置就有5.8厘。另外，穩定高息股派息時，有公司會提供兩個選擇畀投資者，以現金或股票派發股息，例如領展嘅債務紓緩計劃(DRP)及收息後再投資，喺上一次派發末期息時，有超過20%投資者選擇以股代息。
