【Now財經台】內地家電龍頭美的集團(00300)今日(9日)開始招股，集資額係近年最多，有機會問鼎今年新股「集資王」。睇返美的2023年底現金及等價物，有近600億人仔，今次集資所得會用作研發及投入現有業務，今次嚟香港IPO係咪有其他動機？建唔建議散戶入飛抽？
《香港股票財技密碼》作者梁杰文指，美的帳面上現金充裕，今次集資逾200億元，對公司嚟講只係杯水車薪，而集團本身冇乜財務壓力，對今次認購股份嘅投資者嚟講係好事，估計美的係想攞H股上市地位，可能為將來海外併購做準備。
Mike又話，近期大市投資氣氛麻麻，即使美的係家電龍頭，但對美的上市後短期期望唔大，反而可以留意中長線發展，例如可以憧憬納入恒指成分股等，佢建議投資者可以抽嚟長線投資。
