【Now財經台】停牌逾17個月，今早(9日)復牌嘅華興資本控股(01911)，停牌前報7.27元，股價今朝低開逾71%，報2.06元，其後跌幅一度擴大至逾72%，低見1.98元，創新低，其後跌幅略為收窄，中午收市報2.44元，大跌逾66%。
集團上周五(6日)出通告，指已達成復牌指引，包括公布2022、2023年全年及今年上半年業績，並處理了全部審計修改意見，華興又話，合共持有2.2%股權嘅4名執董，承諾明年3月前，唔會出售任何相關股份權益，但對股價似乎冇乜幫助。
此外，核數師對集團2023年業績持保留意見，當中提及冇辦法評估報表中嘅應收帳款及其他應收款項中，逾7700萬元受限款項嘅可回收性，呢筆錢好大機會同公司創辦人、前主席包凡被調查有關，所以仍要密切留意後續發展。
