【Now財經台】市場今年初開始炒作電力股盈利增長，火電股上半年亦有近20%至逾50%增長，派息方面，僅華潤電力(00836)及中國電力(02380)有派息，其中，中國電力係派特別息，兩者派息比率約20%，分別於下周二(10日)及9月30日除淨，除淨前股價跌到現水平，值唔值得買入，博賺息賺價？電力股又應該點揀？
光大財富證券策略師伍禮賢指，短期而言，電力股未有見底跡象，所以唔值得因為一次派息而買入，等股價回升再部署都唔遲，以免賺息蝕價，加上潤電及中國電力同250天線仍有一段距離，喺股價仍未回升下，入市最主要考慮係股價走勢，而非派息因素，有派中期息只代表派息次數增加，唔代表全年派息率最高，所以吸引力有限。
Kenny又話，中國電力嘅發電組合相對平均，包括傳統火力發電及水力發電等，至於揀邊隻股份要視乎投資者睇好邊類發電組合，如果睇好傳統火力發電，不妨留意華能國際電力股份(00902)。
