【Now財經台】截至早上11時止，1小時內《彭博》用戶搜尋量最多港股，依次為農業銀行(01288)、中廣核電力(01816)、國泰航空(00293)、新世界發展(00017)及信義光能(00968)。
內銀股業績後見頂回落，其中，農行股價持續回套，係咪派中期息因素已炒完？內銀派息比率普遍介乎30%至40%，股息率仍然吸引，係咪可以趁股價調整後趁低吸納？
元宇證券基金投資總監林嘉麒指，農行業績其中1個焦點係派中期息，睇返幾條大數，只有收入及淨利潤有增長，其他都倒退，雖然盈利有增長，但派息比率冇提升，令市場對全年派息唔會有額外期望。
內銀板塊係表現最好嘅「中特估」概念股，農行股價今日(3日)曾跌5.6%，主要同發行「總損失吸收能力」債務工具(TLAC)有關，市場可能擔心集資問題，加上明年初要做全球系統重要性銀行(G-SIB)審計，既然近期冇利好消息，只有壞消息，不如呢段時間先沽內銀股。
KK又話，農行喺內房中嘅敞口較少，加上主要客戶同農村相關，壞帳相對少，大環境因素對集團盈利影響亦較小，所以內銀股首選農行。
