【Now財經台】中船防務(00317)母公司中國船舶集團旗下，喺A股上市嘅中國船舶今日(3日)宣布，計劃透過股份互換合併行內另一家造船企業中國重工，受消息帶動，中船防務股價今日高開逾7%後，升幅曾輕微擴大至逾8%，高見14.5元，其後一度倒跌，最新升唔夠1%，成交股數較過去100日同時段平均增6倍，暫時成交金額逾8000萬元。
中船防務今年一度受「中特估」概念帶挈，股價最多累升逾70%，但後來「中特估」熱潮減退，累計升幅最新收窄至約30%。業績方面，受惠於船舶價量齊升，上半年收入增長45%，按年更多賺10倍，但派息唔算慷慨，每股派0.012人仔，派息比率約10%，股息率唔夠1厘。
