【Now財經台】環球股市喺8月5日經歷「黑色星期一」，事隔已超過1個月，到底日圓拆倉危機化解未？市場投資部署有冇改變？
瑞聯銀行北亞股票業務主管林燕表示，日圓拆倉危機仍未完全解決，日圓跟美元嘅息差仍然好大，因為日圓上月升得太急，唔少投資者轉以低息貨幣，例如人仔及瑞郎作為融資貨幣(funding currency)。
佢續指，美國聯儲局減息幅度將主導日圓走勢，又提醒要留意美國周五(6日)公布嘅非農就業數據，若數據唔理想，市場估計減息幅度會較大，屆時日圓將會急升，有可能爆發第2波拆倉潮。
揀高息股方面，Linda就話，喺債息見頂周期下，高息股估值重修，睇好內銀股、中資電訊股、房託及能源相關股，尤其多隻內銀首度或恢復派發中期息，派息次數由1年1次轉為半年1次，反映呢類公司派息嘅決心較大。
