【Now財經台】中國旺旺(00151)股價今日(2日)平開後，一度跌近2%，低見4.43元，其後跌幅收窄。早前，集團出通告，話會向大股東兼主席蔡衍明嘅關連公司，買入1架空中巴士A318，作價1940萬美元，折合約1.5億港元，公司指出，因為全球各地收益顯著增長，認為有需要買飛機畀管理層去巡視業務。
其實呢單消息都有負面之嫌，因為畀人幫管理層埋單感覺，雖然旺旺股價自6月低位3.86元，升返上近期高位4.7元水平，但睇返周線圖，股價仍受制2023年底嘅前橫行底部，即5元水平，相對強弱指數(RSI)近期一直喺50水平，冇轉強跡象，仍然係1隻好弱勢嘅股份。
