【Now財經台】有本地傳媒報道，麗新發展(00488)低調放售旗下海洋公園萬豪酒店，叫價高達50億元，酒店有約470間客房，如果以市傳嘅叫價計，每間客房嘅「身價」逾1000萬元。集團回應傳媒查詢時指，冇主動放售海洋公園萬豪酒店，但不時都有人話有興趣。
其實麗新近排都有出售非核心區物業，例如將軍澳藍塘傲商場連停車場，賣畀華潤集團旗下嘅華潤隆地，作價逾5億元，而昨日(29日)又傳出華潤隆地出價90億元，洽購新世界發展(00017)旗下位於尖沙咀河內道嘅K11 Art Mall，唔知華潤隆地係咪想趁淡市執平貨。
