【Now財經台】交通銀行(03328)及中信銀行(00998)昨日(28日)派咗中期成績表，並雙雙宣布派中期息，交行派0.182元人仔，信行派0.1847元人仔，前者係首次派中期息。交行指，派息比率維持約30%，但其實係咪將末期息「一拆二」，攞部分出嚟做中期息？
冠域商業及經濟研究中心主任關焯照認為，今次派息的確有「拉上補下」嘅情況，但「提早」派息可以帶嚟正面心理作用，雖然交行派息比率僅約30%，但相比派息理想及高派息率嘅企業，交行派息空間其實相對較大。
關博士又指，若美國聯儲局減息，相信內銀都會跟，減息會令息差壓力變大，所以要留意喺息差收窄下，公司預期盈利能否保持穩定，但宏觀而言，減息會利好整體內銀股。
