【Now財經台】「AI股王」英偉達(Nvidia)將會喺今晚(28日)美股收市後出業績，市場估計，集團展望繼續理想，而據期權定價顯示，交易員預期Nvidia出完業績後一日，股價有機會升10%，有望帶挈其他科技股。不過，美國減息預期升溫，有資金流出科技股，投資者做部署時有咩要留意？
南方東英香港分銷銷售部高級副總裁李溢琳指，人工智能(AI)未來仍然係大主題，投資者近期最關注美國大選，一旦特朗普(Donald Trump)勝選，會唔會對非美相關股份如熱炒嘅台積電(TSMC)造成壓力。雖然有呢啲風險因素，但AI始終有需求，所以AI相關股仍值得睇好。
Barbara續指，如果擔心個股風險高，相關ETF可能係另一個唔錯嘅選擇，但要小心控制注碼，始終科技股已經累積唔少升幅，所以唔建議高追，因為可能有回套壓力，又或者投資者會趁好消息出貨。
