【Now財經台】人工智能(AI)晶片股王英偉達(Nvidia)將於美國時間周三(28日)美股收市後出業績，同集團有生意往來嘅幾家公司，業績表現都唔錯，市場估計，Nvidia季度純利按年大升逾1.3倍，但相比前4個季度大幅增長4至5倍，高基數效應似乎開始浮現，導致增長放緩，點影響Nvidia股價未來嘅表現？
易方資本助理基金經理王逸研指，有幾個核心因素會影響Nvidia股價，首先係Nvidia Blackwell晶片延期推出，但影響唔會太大，因為台積電(TSMC)先進封裝技術問題唔大，其次係Nvidia中國銷售表現，尤其係H20晶片仲可唔可以繼續出口到中國市場，佢估計，當美國商務部10月修訂規則後，H20晶片就好難以出口去中國，H20晶片全年出貨量達100萬枚，修訂規則後將對Nvidia有一定影響，而出口到中國市場嘅H20晶片斷崖式減少會令市場十分憂慮。
