【Now財經台】GEM(前稱創業板)今年1月1日起實施改革以嚟，計埋今日(26日)開始公開招股(IPO)嘅集信國控(08629)，只有3隻新股申請喺GEM上市，係咪代表改革唔成功？集信國控又值唔值得入手？
《香港股票財技密碼》作者梁杰文指，上市數字少反映改革失敗，甚至連入紙申請上市嘅公司數目都唔多，背後原因可能係因為高息及港股估值偏低，所以就算進行改革，對本港或內地企業嚟講仍然缺乏吸引力。雖然轉板機制簡化咗，但符合資格轉做主板嘅GEM公司數目少之又少，大部分新股留喺GEM嘅時間較長，亦會影響投資者嘅熱情。佢又話，睇返今年頭兩隻GEM新股，上市後交投冷清，都會影響投資者對嚟緊上市嘅集信國控投資意欲。
睇返集信國控，Mike認為，公司業務冇乜特別，加上公司收入飄忽，所以市場普遍會畀較低估值，但公司招股架構同估值相對進取，甚至可以話非常貴，所以預期反應會比之前兩隻GEM新股更低，佢認為未必值得入飛抽，如果想買呢隻股份，不妨等上市後，等股價消化咗估值或大跌後再考慮。
