【Now財經台】收租股希慎興業(00014)今日(23日)中午出咗業績，股價午後由跌轉升，一度升逾5%，雖然希慎基礎盈利微跌，但仍維持第一次中期息27仙，預測股息率逾10厘，高過同業，喺本地收租股之中係數一數二，希慎股價午後拗腰升，係咪受派息帶動？
紅蟻資本投資總監李澤銘指，相信高息係希慎股價午後抽高嘅主因，公司槓桿及負債比率都較低，亦有足夠現金流支持派息，喺現時嘅經濟環境下，仍可維持派息金額，派息率亦高過同業，係有一定吸引力。
至於可唔可以靠呢份業績令股價企穩100天線？Alan坦言有啲難度，始終整體形勢唔太理想，地產、零售市道向下，希慎較難突圍，雖然集團收入及利潤暫時都維持到，亦有一定股息，但市場會擔心之後無以為繼，加上本港經濟形勢唔理想，物業收租股難轉勢，只係短期因高股息帶動股價反彈，佢估計，希慎有機會挑戰12元關口。
