【Now財經台】日圓7月初開始轉弱，對港人去日本旅遊有更大吸引力，不過，日本近期天氣唔穩定，加上早前發過巨大地震警報，有冇影響港人遊日意欲？旅遊路線有冇大改變？
東瀛遊執行董事禤國全指，依家市民去旅行嘅時間比以前長，所以公司近年喺大旺季期間會加入親子元素，親子團以行程舒適、交通安排妥當作賣點，配合一家大細嘅家庭旅遊。佢又指，依家自由行同參加旅遊團嘅比例係9比1，不過，最近日本發生地震、天氣又唔穩定，有自由行客人轉為參加旅遊團，因為就算遇到天災，都會有領隊照顧，唔使擔心安全問題。
禤國全續稱，長途機票價格仍未重返2020年水平，僅回復70%至80%，而機票價格貴咗，整體團費亦加咗，好多飛歐洲嘅旅客轉去內地較偏遠地方旅遊。隨著航空公司運力提升，今個暑假末唔少航空公司都調整東南亞機票價格，原因係需求少咗，機票價格自然相應下調。
