【Now財經台】吉利汽車(00175)今日(21日)中午出咗業績，半年多賺逾5倍至近106億人仔，期內，總銷量增長41%，各項分部收入幾乎全線有得升，集團又上調全年銷量預測，冇受行業內卷拖累，不過，股價喺業績後反應唔大，僅午後曾短暫倒升，但之後又跌過，市場係咪對呢份成績表唔收貨？
南華金融集團副總裁莫灝楠指，雖然吉利業績算係有驚喜，市場亦收貨，但其實只係中規中矩。佢又話，由於吉利嘅業務定位有別於同業，毛利較差嘅車企大部分因為只賣電動車，但依家電動車產能過剩，市場根本「食唔晒」，導致爆減價戰，始終燃油車需求仍然穩定，而吉利業務較為分散，銷售混能、燃油等唔同類型嘅汽車，雖然佔比唔算大，但足以維持毛利率，所以未受行業內卷影響。
