【Now財經台】據GUM最新數據顯示，港人強積金8月人均蝕1041元，但今年以來仍有約5%增長，人均回報約1.2萬元，表現好過去年首8個月，係咪意味今年環球投資環境好過去年？雖然今年股票基金表現最好，但A股及港股似乎冇乜起色，係咪仍跑輸其他市場？
GUM常務董事陳銳隆指，今年強積金表現係好過去年，主要係港股去年跌幅較顯著，加上港股佔強積金資產總值較多，影響咗去年回報，不過，隨著恒生指數重上17000點，帶動港股基金輕微上升，但升幅相對美股或日股等其他股票基金市場仍有落差。
資金流方面，Michael就話，資金流有增加跡象，較多資金由混合資產基金流出，再流向股票基金及固定收益基金，呢個情況過去較少見，由於現時投資者取向趨兩極化，能承受較高風險嘅投資者傾向投資歐美日股市，雖然呢啲市場較波動，但整體仍然向上，加上回報唔錯，其中，美股係最多資金流入嘅市場。
