【Now財經台】經歷8月5日「黑色星期一」後，隨著美國經濟數據回穩，對經濟「硬著陸」憂慮降溫，睇返美股3大指數，其中，標指及納指已連升8日，美國經濟「軟著陸」係咪已經冇懸念？
滙豐環球私人銀行及財富管理亞洲區首席投資總監范卓雲認為，8月初嘅「黑色星期一」及美國經濟「硬著陸」憂慮造成恐慌，我哋都覺得係言過其實。其實美國一系列宏觀經濟數據，都反映美國經濟「軟著陸」趨勢未變，尤其7月零售銷售增長好過預期，更重要係，新申領失業救濟人數連跌兩周。佢又指，依家美企裁員率處於歷史低水平，雖然7月失業率微升，但更重要係，移民帶動勞工供應增加，導致失業率稍為向上，但由於裁員數字仍偏低，反映美國經濟仍相當穩健，帶領美股上返7月嘅歷史高位。
Jackson Hole全球央行年會今個星期舉行，聯儲局主席鮑威爾(Jerome Powell)會喺本港時間周五(23日)晚上10時發表專題演講，佢嘅講話有咩要留意？
范卓雲又指，由於市場近期較關注美國經濟衰退風險，相信佢嘅演講會作出針對性回應，點解聯儲局相信美國經濟會穩步朝向「軟著陸」，同埋衰退風險受控。
佢續指，必須承認美國經濟增速係有所紓緩，喺高息環境下，而增長率喺未來幾季逐步放緩，亦創造咗一個條件畀聯儲局啓動減息周期，現時滙豐預期聯儲局年內會減息3次，每次0.25厘，並預期明年會減息3次，意味明年合共減息0.75厘，即兩年內政策利率下調1.5個百分點，而步入減息周期，將有利風險資產表現。
