【Now財經台】美國最新就業及零售數據,令市場對美國經濟衰退嘅憂慮降溫,全球主要國債再被拋售,其中,美國10年期債息昨日(15日)曾高見3.95厘,今日(16日)就落返少少,美匯指數就喺103水平徘徊,全周計變動唔大。由於市場對美國經濟有返信心,據最新利率期貨顯示,聯儲局9月減息0.5厘嘅機率回落。美國最新數據係咪引證到經濟冇衰退危機?係咪會利好美走勢?
獨立外匯商品分析師盧楚仁指,美國數據係幾飄忽,最新數據出爐後,市場又認為聯儲局下月只會減息0.25厘,之前price in緊炒減息0.5厘,導致美元急挫,所以呢浸炒返減息0.25厘,對美元會有好大支持,所以見到美債息大幅抽升,美匯指數短期103,甚至104、105進發。