【Now財經台】美國7月零售銷售按月反彈1%，錄得年半以來最大升幅，遠勝預期，而新領失業救濟人數亦連續兩周減少，紓緩市場對經濟衰退嘅憂慮，之前市場擔心美國經濟會「硬著陸」，似乎依家睇法又唔同咗，點解市場對美國經濟前景嘅睇法變得咁快？
華僑銀行利率策略師張淑嫻解釋，市場睇法轉得咁快，主要係美國經濟前景不確定性較高，令市場對數據反應較為敏感，過往因聯儲局較重視通脹，令市場忽略咗其他經濟數據，不過，聯儲局近期開始兼顧返兩邊數據，尤其當通脹未有明顯反彈，經濟活動數據就顯得更重要，亦令市場對經濟前景睇法不停轉變。
Frances又指，最近美國勞工市場冇咁緊張，估計美國經濟將會放緩，現時美國失業率唔算太高，所以整體經濟收縮風險較微，但值得要留意係，喺移民數量增加，職位空缺唔夠之下，不宜過分睇好美國經濟前景。
美息方面，佢認為，除非8月非農數據差過預期，否則，聯儲局唔急於減息0.5厘，因此預期會先減0.25厘，並估計今年餘下3次議息會議中，其中1次有機會減息0.5厘。
