【Now財經台】友和集團(02347)斥442萬元，向捷成集團收購電器零售商J SELECT，公司除咗有門市亦有網購業務。
今次收購代價分兩部份，現金290萬港元，餘下以配發151.6萬股支付，但配股數目唔多，佔股本不足1%，但值得留意係，今次配股價1元，有66%溢價，友和股價今早(13日)高開5％，報0.63元，已見咗暫時高位。
友和上市至今，不論業績及股價表現都唔突出，2022年上市時曾升上2.5元水平，但唔夠1年跌到唔夠1元，變成毫子股，業績對比上市前又走晒樣，收入亦高雙位數增長變成最新要倒退。
收購消息對友和股價刺激作用唔大，暫時成交金額僅逾10萬元，友和現價約0.6元，似乎要重上招股價2.1元難度好高。此外，今次1家規模咁細嘅公司，對集團收入重拾增長動力幫助有幾多？相信市場都唔會有太大期望。
