【Now財經台】資源股萬國國際礦業(03939)近幾個交易日，出咗幾份通告兼有唔少消息，從中睇到公司一啲發展軌軌跡，其中，股東特別大會通過咗改名為「萬國黃金集團有限公司」嘅提案，此外，公司又發咗中期盈喜，而其中一份通告就交代集團增持金礦權益，上述種種明確咗公司主業嘅黃金定位，雖然對股價刺激唔算大，但集團似乎有咗一個明確發展方向？
《香港股票財技密碼》作者梁杰文指，萬國國際連串消息都好正面，公司之前收購嘅所羅門群島金礦開始步入收成期，帶動盈利增幅十分誇張，可以提早發盈喜，由於公司都覺得呢個發展方向係啱，所以直接宣布增持金礦權益，進一步確認公司轉型。
至於股價近日冇太大反應，Mike認為，可能係股價過去1年已經超前反應，由去年唔夠2元升到現時7元樓上，仲一度上過9.9元嘅高位，升咗3倍有多。
