【now.com財經】今朝一起身見新聞出咗黃雨logo，見出面都好似未有事發生咁，但刷完個牙之後見出面開如落雨；再煲完個水之後已經聽到行雷，嚇得我家肥貓又走去檯底暱埋。
行住雷等恒指完U，今朝開市先升12點，由於呢口價計化唔大，所以喺U盤完咗之後、正式開市之前都未有做定出倉準備。及至開市之後，見指數一下子高衝上去但亦都好快出上影線，首五分鐘過去於五分鐘圖上第一粒燭即見高位「墓碑十字星」，作戰室第一注以淡倉應市。
其實依家已經10點4分，指數一仆一碌咁一度落到去17,002點嘅低位後，嚟一個爭兩點嘅「平底」一下子抽高，所以依家作戰室注淡倉借住五分鐘圖條10線睇下有無計再向下碌多次，比返多幾格出嚟。
至於小時圖方面，指數今朝失守10線之後，依家再向20/50線方向出發，唯見小時圖其實有條「上升通道」，而指數目標擺位亦都靠近「上升通道」嘅底線。
的確依家擺位不論同五分鐘圖嘅底線還是小時圖嘅「上升通道」底線都好鬼近，確認向下穿得到先再出淡倉似乎先至再有再淡落去嘅空間。
再嚟到10點17分嘅時間，聽住《微涼之夏》睇市，莫講17,000點，連150線兩度都唔穿，但同時都未見指數再好強嘅上行動力，大不了借Slow STC(14.3)行一趟好倉Swing，恒指牛(66567)，收回價16,650點，槓桿有約37.9倍，同一收價中高槓桿、低街貨。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
