【Now財經台】現貨金價重上每盎司2400美元，美國最新就業數據好過預期，市場對聯儲局9月減息0.5厘預期進一步降至逾50%，金融市場回穩之餘，金價亦喘定。今個星期累計，現貨金價暫累跌約1%，有機會錄得兩個月以來最大單周跌幅。金價有冇力挑戰歷史高位？
MAX Online亞太區業務總監杜浩霆表示，金價有機會再試高位，但要破頂難度就較高，隨著減息時間愈來愈近，炒減息因素已經去到水尾，反而基金及大戶趁高散貨，因為美國9月減息已成定局。佢又建議，年初入市嘅投資者可以開始部署獲利，睇返技術走勢，金價喺2450美元有較大阻力，投資者可以考慮部署下星期出爐嘅美國消費物價指數(CPI)，若CPI放緩，金價有機會衝高。
