【Now財經台】美國昨日(8日)再禁止5家中國企業產品進口，指呢啲公司涉嫌侵犯維吾爾族人權及強迫勞動，被制裁企業包括在港上市嘅稀鎂科技(00601)、稀鎂母公司世紀陽光(00509)，同埋紫金礦業(02899)子公司新疆哈巴河阿舍勒銅業有限公司，今次消息對紫金股價有幾大影響？
高富金融集團投資總監梁偉民指，市場開始對呢類消息感到麻木，始終美國制裁中國企業制裁已有一段時間，而紫金跟美國之間嘅出口、貿易唔多，相信消息對紫金影響好細。
Wyman又指，紫金股價近期下跌只係跟大市回落，現時國際金價仍偏強，企喺每盎司2400美元以上，對紫金嚟講係利好因素，雖然消息令紫金股價再跌多浸，但亦係買入嘅好時機。
