【Now財經台】華住集團(01179)股價今日(8日)除淨，沽壓亦十分沉重，跌幅一度擴大至5%，低見20.8元，跌至21個月低位。
早前集團推出3年共20億美元分派總額的股東回報計劃，承諾全年派息比率至少60%，又指考慮財務狀況後，可不時宣派特別股息和回購股份。集團隨即宣布動用2億美元，作為今年上半年的派息用途，除返開即每股6.3美仙。
公司唔等中期業績，就公布股東回饋計劃，可能想盡快幫股價沖喜，但公布當日股價冇乜支持，反覆向下，有唔少投資者想當日入場收息，但短短兩周，股價已跌咗10%，恐怕要賺息蝕價。
去年疫後復常，集團收入每季都有增長，不過，今年第1季增長顯著放緩。有內媒指，內地暑假出遊需求其實唔差，但第2季表現如何，第3季展望又係點，就要留意8月20嘅業績。
