【Now財經台】太古股份公司A(00019)今日(8日)中午出咗業績，半年少賺逾7%，基本溢利就微跌，市場最關心都係派息，派息增約4%，A股派息1.25元，B股派息0.25元，太古呢份業績有咩亮點？派息又收唔收貨？
艾德金融執行董事陳政深指，太古主要業務包括地產、飲料及航空等，喺目前經濟環境下，呢啲業務無可避免會受影響，雖然整體業務表現唔錯，但市場一般給予綜合企業嘅估值都偏低，因為每個行業嘅估值唔同，所以一定會有落差。佢又指，集團飲料及航空業務表現唔錯，但地產業務相對欠佳，主要受租金收入拖累。派息方面，喺依家嘅環境下，太古仍增加派息已對投資者有交代。
投資部署方面，Ryan表示，因為綜合企業涉及唔同業務，所以投資者對太古嘅估值未必準確，喺太古系入面，佢認為，揀太古A及太古股份公司B(00087)會比較穩陣。
