【Now財經台】日本央行爆冷加息，加上行長植田和男指，若經濟、物價走勢同預測一致，就會繼續加息，以及日圓拆倉潮及美國經濟衰退憂慮，導致日本股市周一(5日)經歷「黑色星期一」，日經平均指數暴瀉逾4000點，錄得歷來最大單日點數跌幅，亞洲股市亦被拖冧。不過，日本央行副行長內田真一出嚟補飛，話央行唔會喺市場不穩時加息，並指會維持寬鬆政策，金融市場隨即喘定。
資深經濟師羅家聰認為，行長早前太鷹嘅言論係好有問題，只會令股市火上加油，副行長之後嘅言論至少令市場穩定返，不過，最主要仍然係睇整體經濟前景，如果前景唔好，靠出口術係唔可以長期穩住市場。KC又指，其實當通脹上升時，日央行就應該加息。
