【Now財經台】截至早上11時止，1小時內《彭博》用戶搜尋量最多港股，依次為國泰航空(00293)、快手(01024)、中國移動(00941)、萬科企業(02202)及永利澳門(01128)。
快手係今日(8日)升幅第2大科指成分股，集團將於8月20日公布業績，首季業績勝預期，加上之前公布新一輪回購計劃，未來3年將合共回購160億元股份，資金係咪喺業績前先炒一轉？
紅蟻資本投資總監李澤銘估計，快手業績會有驚喜，收入增長主要來自直播電商帶貨分成，但傳統電商市佔率及收入增長放緩，甚至出現下降趨勢，不過，直播電商增長仍然強勁，加上有「618電商購物節」效應，相信第2季增長會比第1季更亮眼，投資者不妨考慮喺業績前做部署。
Alan續指，之前快手股價喺低位徘徊咗一段時間，股價整固後出現多個催化劑，業績前值得憧憬，股價有機會挑戰上月中高位，即48元至49元。
