【Now財經台】過去3年，本港樓市持續受壓，若用中原城市領先指數(CCL)計算，樓價已累跌25%，本港地產市道一向對息口敏感，若美國聯儲局開始減息，對本港樓市有幾大支持作用？樓價未來又會點走？
萊坊大中華區研究及諮詢部主管王兆麒指，若美國9月減息，對本港住宅市場一定有幫助，市場擔心樓市反彈得太急，所以成交量開始增加。此外，依家實際按息4.125厘，比起2021年第3季旺市嘅實際按息約1.3厘，相差好遠，影響買家嘅實際供款負擔能力，會幫助到更多買家入市。
佢續指，今年上半年CCL累跌3%，美國減息會有助樓價跌勢放緩，但唔會令樓價回升，佢估計，樓價下半年仍會向下，其中，第3季會跌得比較多，第4季就會喺谷底橫行，樓價全年有機會跌5%。
展望明年，本港樓市表現將會比今年好，因為隨著息口回落，市場購買力會提升，加上貨尾逐步減少，預期樓價明年將會升3%。
