【Now財經台】國泰航空(00293)今日(7日)中午出咗業績後，股價午後倒跌。國泰中期少賺逾15%，營運開支大增18%，主要受燃油成本急升27%拖累，但收入按年增長近14%，派中期息0.2元，主席賀以禮(Patrick Healy)指，上半年客運運力按計劃回復至疫情前80%水平，收入、運力復甦步伐符預期，更重要係，集團相隔5年後，終於恢復派息，其實呢份業績似乎都唔係咁差？
元宇證券投資總監林嘉麒指，業務未完全恢復至疫前水平下，中期息甚至派得多過疫情前，即2019年，所以呢份業績其實已經算唔錯。KK又話，燃油成本一向係航空公司一大挑戰，但全球用油量唔係因為經濟變差而減少，而係用多咗新能源，因此，預示油價未來唔會持續高企，若國泰能恢復埋餘下嗰20%運力，就可以出現規模效益，紓緩燃油成本壓力。
