【Now財經台】美國上周五(2日)出咗非農數據後，市場憂慮美國經濟會陷入衰退，加上環球股市本周經歷「黑色星期一」，令恐慌情緒升溫，而孳息曲線倒掛情況出現逆轉(Disinversion)，美國經濟將會陷入衰退係咪已經寫在牆上？
東亞銀行首席投資策略師李振豪指，債息Disinversion嘅可信性較低，雖然呢個係經濟陷入衰退前嘅「凶兆」，不過，美國即將開始減息似成定局，較短線嘅2年期孳息率較敏感亦係正常，加上10年及2年期債息息差收窄唔係呢兩日先開始，所以係息差影響匯率，而唔係匯率影響息差。
佢又話，冇可能要符合晒先確認經濟陷入衰退，依家美股市盈率(PE)由24倍收窄至21倍，其實係屬於正常調整範圍，並唔係股災，呢啲炒作更傾向係搵藉口套現，多過擔心經濟衰退。
