【Now財經台】一眾內險股今日(6日)跑輸大市，其中，以中國太保(02601)跌得最多，AH股齊大跌，A股一度挫逾6%，港股更一度大冧逾12%，曾低見17.62元，跌至逾3個月低位，收市仍跌10%，報18.1元。
國家金監總局上周五(2日)宣布，下調人壽保險產品定價利率上限，雖然太保主要做財產保險，但人壽保險業務喺內地市佔率排第3位，今年首季壽險業務增長動力理想，不過，滙豐證券擔心下調息率上限，有可能影響壽險業務嘅新業務價值(NBV)增長。
太保今日大跌前，股價今年累升35%，大幅跑贏其他內險股，喺市況動盪下，資金有一定誘因沽貨獲利，依家跌穿埋近3個月嘅橫行區，暫時仲守得住18元之上嘅100天線，同250天牛熊線，即16.6元仍有一段距離。
