【Now財經台】九龍倉置業(01997)股價喺今日(6日)早市持續受壓，中午出咗業績後，跌幅逐步收窄，尾市更倒升。集團上半年轉蝕逾10億元，收入近乎持平，主要受物業重估減值損失高逾44億元拖累，同盈警預告一樣，值得留意係，減值虧損仲高過基礎盈利，九置一早發咗盈警，蝕錢已經預咗，咁呢份成績表及派息收唔收貨？
信達國際研究部董事趙晞文指，業績及派息都唔算特別意外，不論睇收租股或本地地產股，比較重要嘅衡量指標都係撇除物業重估減值變動後嘅基礎盈利，因為呢類投資物業虧損唔係實數，只係考慮物業價值變動防利或防虧，唔會帶嚟虧損。
晞文又話，雖然上半年本港整體零售市道麻麻，但九置上半年基礎盈利及收入都達至市場全年綜合預測嘅一半，算係交到功課，加上九置派中期息嘅金額，相當於基礎盈利約65％，都算幾慷慨，總括而言，九置呢份成績表算係啱啱合格。
