【Now財經台】截至早上11時止，過去1小時內《彭博》用戶搜尋量最多港股，依次為中國移動(00941)，中電控股(00002)、國泰航空(00293)、美高梅中國(02288)、中升集團(00881)。
港股今朝(6日)反彈，但中資電訊股繼續插水，其中，中移動70元關口都危危乎，暫時已跌穿100天線，對於周四(9日)公布嘅業績有冇期望？派息方面係咪值得憧憬？
富途證券首席分析師譚智樂指，現階段中移動派息比率仍達標，但要高過原來介乎60%至70%就比較難，所以都唔會有咩期望，依家中移動股息率逾6厘仲係好吸引，相信會有投資者博反彈，不過，短線嚟講，由於中移動唔係跌得最傷，股價自高位回落咗唔夠10％，就算大市反彈，都未必會大升，但70元水平會有支持。
Arnold建議有貨嘅投資者可以繼續揸住，繼續睇住業績做部署，因為中資電訊股對經濟敏感度唔高，加上市場預期美國聯儲局快將減息，由於公司毛利率仍維持下降趨勢，所以投資者繼續作為中長線收息，博財息兼收係一個唔錯嘅選擇。
