【Now財經台】環球股市經歷「黑色星期一」後,今早(6日)普遍反彈,係咪因為隔晚(5日)美國嘅7月ISM服務業指數重現溫和增長並重上擴張線,緩和返恐慌情緒?
中泰國際策略及博彩行業分析師顏招駿認為,市場係借助早前嘅美國製造業數據轉差嘅消息,利用過份憂慮嘅情緒來趁機調整,並指美國經濟衰退係言之尚早。
Alvin指出,相比只佔美國國內生產總值(GDP)約10%嘅製造業,當地服務業佔GDP近70%,顯然更能反映當地經濟情況,加上美國第1季GDP按年增長3.1%後,上季仍保持按年升2.8%嘅良好增長。
Alvin續指,其他經濟數據亦未見經濟急速衰退嘅跡象,比如最近持續上升嘅申領失業救濟金人數,仍然遠少於過去幾次經濟衰退階段,或聯儲局減息前3個月嘅數據,當時平均每月人數可達30萬,而最近3個月平均每月僅約24萬人申請。
此外,Alvin話更重要係,6月白宮上調2024財年嘅赤字率至7%,相信美國嘅財政政策有足夠銀彈支持經濟持續增長。