【Now財經台】亞洲電視控股(00707)建議「2供1」，供股價0.1元，較上周五(2日)收市價折讓46.81%，並指集資淨額約6342萬元嘅80%將用作還債。股份今朝低開9%後，午後曾急挫20%至全日低位0.15元。
公司似乎幾手緊，7月中先配股集資完逾3400萬元來還債，6月時又沽咗一批大馬上市公司嘅持股，套現近1600萬元。《香港股票財技密碼》作者梁杰文表示，亞視截止去年底手持現金1390萬元，而單計短期流動債規模已逾8億元，一堆應付帳項同街數逾4億元，光靠呢幾次集資難以緩解短期債務壓力，隨時又畀債權人入稟法院申請將公司清盤。
公告亦交代，亞視正與部分債權人磋商將約2億元債務資本化。Mike解釋，即係以股代債，發行新股「抽水」，而小股東參與供股可謂有害無利，因為即使佢地願意低價供股，手上持股仍有被大比例攤薄嘅風險。
此外，Mike認為，亞視同時宣布罷免主席劉敏斌相當耐人尋味，指劉敏斌作為最大單一股東，持股比例因上月配股被攤薄至約14%，而佢目前未表明會否參與供股，因此猜測其他董事或順勢借助今次供股「逼宮」，進一步攤薄主席嘅持股。
