【Now財經台】日本央行7月31日加息至今，日圓已累升約5%，每百日圓兌港元升至5.3元。在日圓急升下，日股喺短短幾個交易日內已跌逾11%，日經平均指數今朝(5日)再暴瀉逾2000點。
不過，花旗銀行投資策略及資產配置主管廖嘉豪表示，雖然預期日股急跌後短線表現牛皮，但睇好當地內需復甦將推動日股喺9月重拾升勢，因為該行估計今年初當地企業大幅加薪嘅效應會喺8月完全反映。KA續指，隨住日本走出「迷失30年」並走向通脹，日股唔再需要靠弱日圓拉動出口需求來利好，未來會由居民消費及企業資本投資嘅增長推升股市。
此外，KA認為，日圓拆倉潮影響匯市多於股市，並指息口由0.15厘上調至0.25厘，唔會大幅加重借日圓嘅利息成本，而且唔少海外投資者係借日圓來買日股，匯率風險遠低於借日圓投資墨西哥披索等新興市場貨幣。
