【Now財經台】美國上周五(2日)出爐嘅新增非農職位遠少過預期，失業率又爆冷升至近3年高位，美股3大指數全線下挫，其中，道指瀉逾600點，減息預期方面，聯儲局9月減息似乎已成定局，依家焦點落喺減息幅度，減息0.5厘嘅機機已升至74%，就業數據對減息時間及幅度影響有幾大？
星展銀行(香港)豐盛私人客戶執行董事鄧威信表示，最新公布嘅非農數據的確係出乎預期地差，雖然失業率已經升咗一段時間，但市場反應今次特別激烈，原因係數據為投資者提供咗鎖定利潤或高位沽貨嘅藉口。減息方面，佢認為，如果冇充分數據證明美國勞工市場急速惡化，估計聯儲局唔會大手減息0.5厘，佢相信9月減息0.25厘嘅機會仍然較大。
