【Now財經台】雖然比亞迪股份(01211)銷量月月有增長，但股價已自7月中高位回落咗13%，競爭對手Tesla行政總裁馬斯克(Elon Musk)喺社交平台話，如果比亞迪再唔發展全自動駕駛就會出問題，點睇馬斯克呢番言論？
紅蟻資本投資總監李澤銘指，現階段比亞迪其實唔急於發展自動駕駛技術，因為有全自動駕駛或輔助駕駛嘅車型，售價絕大部分超過20萬元，睇返比亞迪嘅銷售數據，係主攻唔超過10萬人仔嘅汽車，例如「海豚」系列，以呢個價位嚟講，如果要求有自動駕駛似乎有啲過份。
Alan又話，其實自動駕駛技術唔一定要全自主研發，可以搵相關初創公司合作，所以即使比亞迪喺呢方面比較落後，想後來居上難度亦唔高。
