【Now財經台】今日(2日)打入升幅榜頭5位，B仔股宜明昂科(01541)股價今朝裂口高開11%，升幅喺短短5分鐘內急速擴大至近53%，高見22元，衝上近5個月高位，但升幅好快縮至唔夠20%，成交股數較過去100日同時段平均大增20倍。
集團最新公布同美國1家藥企合作，獨家授權喺大中華地區以外，研發及商業化兩款治療癌症嘅藥物，宜明昂科會先收取唔超過5000萬美元，之後有最多21億美元嘅潛在收益，仲會按全球銷售額計嘅特許權使用費，但要留意呢兩款藥物喺內地仍處於一期臨床試驗階段。
宜明昂科今日借消息大幅炒上，但亦出現咗一支好長嘅避雷針，可能市場都對產品仲未上市，係咪可以喺海外成功商業化存疑，後市要留意集團嘅業績，睇下衝出海外對公司有幾大幫助。
