【Now財經台】中資券商股弘業期貨(03678)今日(31日)股價平開後，早段變動唔大，但約早上10時後，喺在成交配合下發力衝高，不斷刷新日內高位，一度飆逾66%，高見1.98元，成交股數較過去100日平均激增134倍，成交金額逾1.6億元。
弘業及成板券商股今日反應咁大，可能同中證監委任新副主席有關，由李明接替已屆退休年齡嘅方星海，李明曾任發行監管部，2016年開始出任中小企股份轉讓系統總經理，任內主導新三板改革等，改革印象鮮明，市場可能憧憬佢上任後，推動資本市場加快改革。
內地昨日(30日)召開中央政治局會議，再提及資本市場內在穩定，但由三中全會開始憧憬嘅市場改革，包括取消H股印花稅等，到依家仍只聞樓梯響。
弘業今日跟住其他券商股衝高，但似乎升得有啲誇張，到底有冇其他原因，就要留待公司公布，弘業每股帳面值1.8元人仔，今日高位上到1.98元，用帳面值計，已經冇乜水位，加上14天相對強弱指數(RSI)急升至87，小心極超買後大幅回套。
