【now.com財經】今次真係家貧出孝子，在香港現時的惡劣形勢下，江旻憓以及張家朗竟然攞到奧運金牌，應該仲會多幾個獎牌，至於我點解會話形勢惡劣，大家試想一下，一個又病，又俾人打，又唔准食藥的人是否很惡劣，香港現在就好似那個人。
在過去十年，經濟環境最好的年份應該是2018年，但很不幸當年我們出現社運，令到香港經濟出現負增長，更不幸的就是在經濟還未復原時就出現長達三年的疫情，情況就好似一個俾人打傷的人，在外傷未愈的情況下患上大病，本來生病受傷，只要敷藥食藥，隔一段時間就必定會好返，但竟然有人唔准香港食藥，所以，即使香港會好返，都需要一段長時間。
很多人不明白，究竟唔准香港食乜藥，無論任何地方，如果經濟很壞，獨步單方就是放寬銀根，降低利率，令到多些人可以做生意，消費，甚至清還貸款，有消費經濟社會自然繁榮，但香港現在背道而馳，不少銀行向客戶call loan，又唔放貸，令到不少客戶要出售自用物業，甚至要結束生意，由於銀行唔借錢俾人買樓，有迫切性賣樓的業主唯有一再降價，但由於對樓宇需求的基本因素冇變，最後出現租金上升，樓價下跌的反常現象，不過大家又不用擔心，一個健康的人，即使俾人打，又生病，又唔准佢食藥，但隔一段時間，唔死得的話，一定會好返，這個情況我相信很多人都試過，如果死咗，唔准病人食藥的人就會覺得自己決斷英明，俾一個將死的人食藥簡直是浪費，銀行現在就是用這個眼光睇客戶，認為客戶最終都冇錢還，點解要借錢俾佢哋，香港要靠自己好返，好多謝香港運動員，不但令香港人有所寄托，攞到金牌好似替我們打咗支強心針。
