【now.com財經】坦白講噚晚乒乓球混雙真心精彩，港隊排行第四已經係一個好好嘅成績；場冠軍戰亦睇得肉緊。各國運動員都出盡力，將自己過去訓練成果展現出嚟。今日下午至黃昏都仲有乒乓球單打，亦都有港隊成員出戰，加油！
至於恒指今日都「加咗油」，先升67點開市之後，到依家10點6分指數已經將升幅推到上過百點，暫時最高見過17,134點，同日線圖嘅150線約17,141點，故且睇下中午時滙控(00005)出業績時有無驚喜。
小時圖上見指數喺10點打後已經重上10/20線以上水平，而保歷加通道口保持橫行及Slow STC(14.3)兩線仍然向上之下，作戰室今朝嘅好倉雖然仍然採格仔策略，不過企得穩線嘅話，輕輕地轉向用小時圖睇下有無佛系好倉出到都唔係無可能。
不過見今日指數五分鐘圖都知佢上行得幾辛苦，支支燭都唔細但一陰一陽咁樣出，定力少啲都死。
所以，今日比較安全啲係注碼上控制一下，雖然平時都唔係大注，但今日可能由一個午餐縮一縮變成一個常餐注先。
恒指牛(65520)，收回價16,750點，同現價有約364點距離，槓桿有約37.2倍夠做Day Trade架啦，小時圖企好中軸出合理，小心埋五分鐘圖依家條Slow STC(14.3)出緊超買再超買；又所以講多次：注碼上留意一下。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
