【Now財經台】恒隆地產(00101)上半年少賺逾55%，中期息按年大減33%至12仙，今日(30日)中午出咗業績後，股價一度急瀉15%，低見5.42元，跌至逾3年低位。
其實恒隆地產出業績前，滙豐證券及摩根大通已唱淡本地地產股，摩通更「批中」恒隆地產會削減派息，雖然原本係估全年派息減19%至63仙。華盛證券財富管理部董事李偉傑預期，睇唔到恒隆地產下半年業績有改善契機，又估計末期業績應該好難維持派高息。
不過，Jason認為，小股民唔需要對恒隆地產派息前景太悲觀，就算末期息按年再減33%，即由0.6元減至0.4元，令全年派息縮至0.52元，以現價計仍有逾8厘股息率，利息收益仍高過喺銀行造定存，佢又認為，恒隆地產股息率調整壓力正逐步消退，唔使擔心賺息蝕價。
Jason續指，雖然恒隆地產股價喺業績後「跳水」，但市帳率(PB)僅約0.2倍，低過同樣被摩根大通估計會削派息嘅新鴻基地產(00016)及九龍倉置業(01997)，佢預期，恒隆地產股價未來下跌空間唔大，應該可以喺5元水平喘定。
