【Now財經台】國華集團(00370)今日(30日)一度打入港股升幅榜第1位，股價今朝高開7%後，升幅一度擴大至58%，高見0.155元，升上5個月高位，其後升幅輕微收窄。
國華有好多瓣業務，包括證券及期貨經紀、航空及海上貨運等，仲有貢獻最多收入嘅樓宇建築承包，近年就開始進軍數據分析範疇。
集團昨晚(29日)公布，將會同有國企背景嘅中國廣電寧夏網絡簽訂戰略框架，參與建設數據中心，部署高性能電腦。
國華股價今年暫時累跌34%，內地樓市一直冇起色，拖累集團去年收入大跌57%，暫時仍蝕緊錢。國華今日成交股數約700萬股，較過去100日平均飆46倍，成交已連續6個交易日出現異動，可能有「春江鴨」小注部署。國華平日成交疏落，有個別日子仲零成交，所以小股民衝動入場後，想沽貨離場並唔容易，或者觀望埋今次新搞作，集團有幾多錢落袋，再考慮係咪入場。
