【Now財經台】納斯達克100指數昨日(29日)收市靠穩，今晚(30日)美股收市後出季績嘅微軟(Microsoft)及超微半導體(AMD)都係納指成分股，參考之前Tesla及Google母企Alphabet放榜後股價要捱沽，業績期應該點部署納指嘅衍生工具？
瑞銀亞洲股票衍生產品銷售部李梓維指，現時納指100天線喺18700點水平，市場上較近價嘅牛證，收回價18600點，收回風險遠高於同期供應嘅窩輪。Alvin續指，保守啲可以揀行使價約20000點嘅CALL，或者收回價喺17000點水平嘅PUT，槓桿做到逾10倍，又可以避開收回風險。
