【Now財經台】摩根士丹利將Tesla列為行業首選，踢走福特汽車(Ford)成為最佳車股，Tesla股價隔晚(29日)收市升逾5%，大摩最新睇310美元，較上周五(26日)收市價有40%上升空間，主要睇好Tesla可成本削減、來自內地嘅收入貢獻增加，加上市傳集團計劃年前喺內地推出全自動駕駛系統(FSD)，呢啲因素係咪會幫到Tesla股價企返穩？
高富金融集團投資總監梁偉民指，Tesla嘅無人駕駛發展時間比其他公司短，唔認為Tesla技術上有領先優勢，加上早前公布嘅業績令市場有啲失望，而銷售疲弱令盈利受壓。佢又話，電動車競爭十分激烈，估計Tesla要繼續減價谷銷售，意味毛利率將持續受壓。
Wyman又指，市場一度將Tesla投資重點放喺無人駕駛及機械人，但呢兩項業務喺未來幾季，都唔會有明顯收入及盈利貢獻，始終監管機構都擔心喺路面上大量使用無人駕駛嘅可行性，所以未來一兩年廣泛使用無人駕駛機會唔大。
